Amalie Kasin Lerstang

(født 1988)

Amalie Kasin Lerstang (f.1988) er frå Notodden. Ho er utdanna tekstforfatter frå Westerdals Høyskole og har studert litteraturvitskap.Som forfattar debuterte ho med romanen Europa i 2014, som ho fekk Tarjei Vesaas debutantpris for. Ho har tidlegare skrive og medverka i stadspesifikke framsyningar med teaterkompaniet SELSKAP. Stykket ho har skrive for DUS, Løven sover, er utvikla i samarbeid med Notodden Barne- og ungdomsteater, som valde henne som «sin» forfattar.

Om Løven sover
Agnes begynner i ny sommarjobb i ein fornøyelsespark, men første dag viser det seg at jobben er noko heilt anna enn det ho hadde venta. Det kjem ikkje publikum til parken, og dyra som ho hadde gledd seg til å stelle, får ho ikkje sjå. Likevel ufører ungdommane som jobbar der dei meiningslause oppgåvene sjefen ber dei om, dei står utanfor inngangen og roper om alt det parken ikkje har å by på, og ingen høyrer dei. Agnes bestemmer seg for å bryte reglane, ho går inn i parken, inn til dyra, som òg ser ut til å ha gitt opp.
Løven sover handlar om det som kan skje når vi i vårt evige strev etter å prestere, blindt lyder autoritetar utan å stille spørsmål om kva og kvifor.